Svabhāvavādaḥ
anekaduḥkhamayaḥ saṃsāraḥ sarvathā hetunirapekṣa
eva | vastuto'yaṃ saṃsāraḥ svabhāvādeva bhavati | svabhāvo hi hetunirapekṣataiva
|
nityasattvā bhavantyeke nityasattvāśca kecana |
vicitrāḥ kecidityatra tatsvabhāvo niyāmakaḥ | |
bahirūṣṇo jalaṃ śītaṃ samasparśastathā'nilaḥ |
kenedaṃ racitaṃ tasmāt svabhāvāt tad
vyavasthitiḥ | |
vastūnāṃ kādācitkatvaṃ tu uttarakālasiddhimātreṇaiva
pratīyate, etatsarvam ahetuvāde'pi
siddhatyeva | vastutastu kādācitkabhāvo nirhetukaḥ, bhāvatvāt, vyomavat | vastūnāṃ yadavadhi niyatatvaṃ dṛśyate
tadapi svabhāvādeva bhavati | yato hi niyatadeśavṛttittvaṃ niyatakālavṛttitvaṃ
svabhāvādeva sidhyati | svata eva bhāvā jāyante naśyanti ca | kādācitkaḥ ( padārthaḥ ) hetusāmagrīnirapekṣaḥ padārthatvāt
naiyāyikasammataprāgabhāvapadārthavat | vastūnāṃ hetusāpekṣatve svīkriyamāṇe
anavasthā syāt | api ca , kāryāṇāṃ
hetuparamparāsvīkāre prativādināṃ sammata īśvaro'pi kathaṃ na syāt | kiñca , ghaṭādiḥ ahetukaḥ padārthatvāt, parasammateśvarādivat |
kalpitastu kāryakāraṇabhāvaḥ
niyatapaurvāparyāvabhāsaḥ yogīcchāto'pi vastūnāmutpādāt, svapnādāvapi ghaṭāderūtpādāt | na hi svapniko
ghaṭo bhrāntaḥ svapne prabodhaparyantaṃ tasya vastutvāt | na hi sarvaṃ vastu
sarvadā sadeveti vastusvabhāvaḥ | tantubhya eva paṭa iti pauvāparyāvabhāsastu kṛttikārohiṇyutpādādau
paurvāparyāvabhāse satyapi tayoḥ kāryakāraṇabhāvanirāsāt nirastaḥ |
na hi sataḥ sadeva utpadyata ityapyasti
kāryakāraṇabhāvasiddhaye ālambaḥ | vijātīyād gomayād vṛścikotpattidarśanāt, prāgabhāvasya naiyāyikaiḥ kāraṇatvasvīkārācca
| kadācid vartamānebhyastantubhyaḥ paṭaḥ, kadācit naṣṭebhyaḥ kṣīrebhyo dadhidarśanāt |
niyatadeśavṛttitvaṃ niyatakālavṛttitvamapi
svabhāve eva hetuḥ, na tu kāryakāraṇabhāvasvīkāre, yato hi svabhāvādeva tantudeśavṛttitvaṃ paṭādīnām, na tu vemādideśavṛttitvam | kādācitkatvamapi
svabhāvādeveti paryavasyati | yato hi kāryasyāhetukatve'pi tattatkāraṇatvābhimataniyatottarakālavṛttitvam, na tu kālāntaravṛttitvamiti niyamo'pi
svabhāvādeva sidhyati |
na hi prayojanamuddiśya jagatpravṛttiriti
niyamo vajralepāyate, yena cetanasya kasyacit
kartṛtvaṃ sidhyeta | bhavedetadevaṃ yadi pravṛttiḥ prayojanavattayā vyāptā
bhavet, na tu eṣā tathā'sti |
ananusaṃhitaprayojanānāmapi yādṛcchikīṣu kriyāsu pravṛttidarśanāt | api ca , vṛthāceṣṭākartṛṇām abhāve na kurvīta vṛthā ceṣṭām
iti dharmasūtrakṛtāṃ pratiṣedhavacanamapi nirviṣayaṃ syāt |
dṛśyate hi āśvāsa- praśvāsalakṣaṇā kriyā prayojanam
ananusandhāyaiva bhavati, anyathā kasyacidapi
bhūtasya maraṇameva na bhavet | duḥkhodreke rodanavat sukhodreke hāsagānādeḥ
prayojanoddeśyarahitasya sarvānubhavasiddhatvāt |
pravṛttiḥ saprayojanaiva bhavati | ataḥ
aprayojanavato brahyaṇaḥ kathaṃ jagadutpattiriti | tatrāhuḥ bhagavatpādāḥ - " yathā cochvāsapraśvāsādayo'nabhisandhāya bāhyaṃ
kiñcit prayojanaṃ svabhāvādeva sambhavanti, evamīśvarasyāpi anapekṣya kiñcit
prayojanānantaraṃ svabhāvādeva kevalaṃ līlārūpā pravṛttirbhaviṣyati" " na ca svabhāvaḥ paryanuyoktuṃ śakyate | " atra mayā ucyate- yadi īśvaro'pi svabhāvādhīna eva śāṅkare'pi
mate sṛṣṭiṃ vidhāsyati, tarhi ahetukāt
svabhāvādeva sṛṣṭiriti manyatām, kimantargaḍunā īśvareṇa |
īśvaravādasya ḍiṇḍimaghoṣaṃ kurvatā'pi
praśastapādena āptakāmeneśvareṇa kathaṃ sṛṣṭirbhaviṣyati iti śaṅkāyāḥ
pratyuttarārthaṃ svabhāvavāde eva śaraṇaṃ prāptam- athavā śaktisvabhāvyāt ( īśvarasya pravṛttiḥ ) yathā kālasya vasantādīnāṃ paryāyeṇābhivyaktau
sthāvarajaṅgamavikārotpattau svabhāvataḥ, tathā īśvarasyāpi āvirbhāva-anugraha- saṃhāra- śaktīnāṃ paryāyeṇābhivyaktau prāṇinām utpatti-sthiti-pralayahetukatvam |
yadi īśvarasya īśvaratvaṃ svabhāvamūlakameva , tadā kimiti īśvarakalpanayā |
kiñca īśvāro na kāraṇam, upalabdhilakṣaṇaprāptatve sati
anupalabhyamānatvāt, śaśaviṣāṇavat | śaśaviṣāṇaṃ
hi anupalabhyamānasattākam , ato na bhāvānāṃ kāraṇam | na cāyamasiddho hetuḥ- padmakesarādīnāṃ kaṇṭakataikṣṇyādīnāṃ kāraṇasya
anupalabhyamānatvāt |
yathā ca bāhyānāṃ padārthānāṃ kāraṇānualambhād
ahetukatvam, tathā ādhyātmikānāmapi duḥkhādīnām
ahetukatvameva | atrāpi anumānaprayogaḥ -
yat kādācitkaṃ tad ahetukam, yathā kaṇṭakataikṣṇyādi, kādācitkāni ca duḥkhādīni, atastānyapi ahetukānyeva |
ata evoktaṃ śāntarakṣitena -
janmanyapekṣā bhāvānāṃ na ca svasya parasya vā
|
sarvahetunirāśaṃsaṃ bhāvāḥ sarve bhavanti hi |
|
rājīvakesarādīnāṃ vaicitryaṃ kaḥ karoti hi |
mayūracandrakādirvā vicitraḥ kena nirmitaḥ |
yathaiva kaṇṭakādīnāṃ taikṣṇyādikamahetukam |
kādācitkatayā tadvad duḥkhādīnāmahetutā | |
hetubhūti niṣedho na svānupākhyavidhirna ca |
svabhāvavarṇanā naivāvadherniyatattvataḥ | |